Il problem e sia sligiaziun - ni patertgar pli baul vid pli tard

ina survesta actuala el schaner 2015

La Casa da sulegl a Pustget – in urgent impuls per famiglias e l`economia.

Trun oz - ed il problem da damaun: analisa e sligiaziun.

A Trun exista oz aunc ina buna ed intacta infrastructura da viver per giuven e vegl. Quella ei denton fermamein periclitada tras la rapida digren dalla populaziun (mira www.interesstrun.ch).

Ils fatgs ein clars: En 10 onns dumbra la scola superiura Trun e Sumvitg ensemen sulettamein ca. 28 scolars – nus havein lu pia treis annadas en duas vischnauncas cun 28 scolars!

Scolars ella superiura Trun/Sumvitg

Nus havein fatg la cooperaziun da scola gia cun 82 scolars. Pia vegnin nus en paucs onns puspei a discussiunar sur da nossa scola el vitg – lu va ei denton per l`existenza da nossa scola el vitg!

Pusseivel eis ei lu da fuormar centers da scola sisum la Cadi sco era engiuvars el center dalla Surselva, quei che munta in transfer da nos affons ordeifer nies vitg; per exempel cun in bus la damaun allas 7.00 naven da Trun che tuorna puspei el vitg allas 17.00. Capeivlamein vegnan famiglias giuvnas lu buc neutier a Trun a star e famiglias che stattan gia a Trun van els vitgs numnai a habitar. La consequenza ei che la digren dalla populaziun a Trun s`accellerescha aunc pli spert e nies vitg spiarda sia infrastructura, fetg baul la scola, suenter las stizuns, lu ils mistergners ed aschia vinavon.

Segiraus ei il futur dil vitg sulettamein, sche la populaziun da Trun po crescher. Trun sto perquei daventar in dils pli attractivs vitgs en Surselva per famiglias. Ord il questiunari sa Interess Trun detagliadamein tgei che giuvnas famiglias giavischan per sedecider da sedomiciliar a Trun. Sin fundament dallas numerusas rispostas ha Interess Trun elaborau dus projects: In ei destinaus per la tgira d'affons e l'auter s’occupescha da habitaziuns adattadas per famiglias perquei che quellas maunchien a Trun. Interess Trun ha perquei elaborau il project Casa da sulegl.

In emprem baghetg duei animar famiglias da vegnir neutier e far lunsch entuorn enconuschent che Trun porschi in fetg emperneivel ambient da viver per famiglias. Quei animass ulteriuras famiglias da vegnir a Trun, aschia ch’era ulteriuras habitaziuns existentas da privats vegnessen occupadas ni adattadas pil diever da famiglias. Aschia profitassen era locaturs privats cun lur habitaziuns existentas. La Casa da sulegl a Pustget ei pia buc ina concurrenza per habitaziuns da tscheins existentas da privats. Plinavon survegness era l`economia da Trun in niev stausch.

Pass per pass dat ei pli e pli moviment ella veta da nies vitg cun sia infrastructura, sias uniuns ed autras activitad

La Casa da sulegl

Il liug a Pustget ei predestinaus per famiglias. La situaziun ruasseivla, naven dil traffic mo tuttina en la vischinonza dil coc dil vitg cun scolas, stizuns e la staziun da viafier plaidan per Pustget.

La Casa da sulegl porscha a famiglias in ideal habitadi che quarcla ils basegns d‘ozendi d‘ina famiglia cun 2-3 affons. Generusa grondezia dallas habitaziuns da 4.5 -5.5 stanzas, gronda terrassa, atgna entrada, local supplementar, suttetg pigl auto (surfatscha da nezzetg 148m2)

La construcziun da strom cun auters materials naturals procura per ina moda da viver sauna e cun emperneivla atmosfera. En cumbinaziun cun trer a nez l‘ energia solara san ins sminuir ils cuosts accessoris sin 10 pertschien dad ina habitaziun convenziunala.

Viver ecologic e saun cun tut il comfort sin in generus spazi per in prezi giustificau. Quei ei la Casa da sulegl a Pustget.

Finanziaziun

Model da finanziaziun:

1‘300‘000.-Hypoteca bancaria:
200‘000.-Fonds de Roulement-Darlehen: tras societad cooperativa (Baugenossenschaft)
150‘000.-Terren da baghegiar:
350‘000.-Summa aviarta

La summa aviarta sa vegnir cuvretga culs suandonts mieds:

  - screts da participaziun da privats
  - screts da participaziun dallas fatschentas involvadas en la construcziun dalla casa
  - ulteriuras firmas, instituziuns, interessai
  - il rest entras emprest ni segirtad tras la vischnaunca

Cavazzins pertuccont la finanziaziun:

-Purtadra dalla Casa da sulegl a Pustget ei ina societad cooperativa (Baugenossenschaft)

-La vischnaunca sustegn la cooperativa cun cumprar screts da participaziun ed aschia esser ina part dalla cooperativa sco era privats ni fatschentas san esser.

-Il model da finanziaziun preveda che la vischnaunca survegn anavos ils daners empristai. (eventual schizun cun in gudogn) Ella ei cunproprietaria.

-Privats e firmas san vegnir part dalla cooperativa cun cumprar screts da participaziun cun in tscheins da ca.1.5 pertschien. Els ein lu cunproprietaris.

-Dapli screts da participaziun che privats e fatschentas cumpran e pli pigns ch‘ igl emprest ni la segirtad dalla vischnaunca ei.

La vischnaunca sto sil pli bia dar ad emprest 350‘000 francs.

-Il terren dalla vischnaunca a Pustget vegness daus el dretg da baghegiar. Buc da cumparegliar cul terren dalla vischnaunca ch‘ei vegnius cumpraus da privats ed ei aschia en lur posses . (Aschia vesan ei era las 3 famiglias pertuccadas che han cumprau terren dalla vischnaunca a Pustget e baghegiau).

Finamira

Il project dad Interess Trun vul dar in emprem impuls per mantener nies vitg, nossa cuminonza cun nossa infrastructura, nossas uniuns e cultura e tut quei che fa Trun emperneivel. Ei va per che buca memia bia svaneschi. Quei project porscha valurs cuzzeivlas, ei finanzialmein supportablels e ha ina dimensiun raschuneivla! Nus stuein metter communablamein prioritads per nies futur!



Per Interess Trun:

Pieder Decurtins, Martin Tomaschett