RTR, Nagin sustegn da la vischnanca per Interess Trun

Publicaziun: 31-01-2015, 09.30 / www.rtr.ch


La suprastanza communala da Trun ha decidì da na betg sustegnair il project da Interess Trun. Quai ha il president da vischnanca Dumeni Tomaschett ditg a Radiotelevisiun Svizra Rumantscha. Il project da Interess Trun prevesa ina chasa da 4 abitaziuns adattadas per famiglias che custa 2 milliuns francs.

Sanar ed adattar abitaziuns vitas
Quella chasa duai dar in impuls a Trun da daventar pli attractiv per famiglias uschia che novas famiglias vegnan a sa chasar a Trun. Tenor Martin Tomaschett d’Interess Trun è quai ina pussaivladad per franar la depopulaziun.

L’idea da attrair novas famiglias en la vischnanca sustegn Dumeni Tomaschett cumplainamain. Tenor el n’èsi dentant betg da bajegiar novas abitaziuns, mabain plitost da sanar ed adattar las bleras abitaziuns existentas ch’èn vitas.

Nova sfida
Tenor Martin Tomaschett è Interess Trun schon in pau trumpà da la decisiun dentant uschè svelt na dettia Interess Trun betg si. La nova situaziun saja dentant ina sfida che haja era avantatgs. Cun realisar il project sin basa privata sajan ins libers da la vischnanca e decisiuns possian vegnir prendidas pli svelt, manegia Martin Tomaschett.

Ussa stoppian ins anc ina giada ponderar da nov co finanziar il project. Pertge senza sustegn da la vischnanca n’èsi betg cler sche la Cumissiun federala per la construcziun d'abitaziuns dettia tuttina daners. (rtr/gh)

Actual la damaun: Nagin sustegn da la vischnanca per Interess Trun (31-01-2015)


>> http://www.rtr.ch/home/utensils/players/audio.825c3409-464d-4f08-bc65-d1e46cf2f570.html?/home/novitads/archiv/2015/01/31/Nagin-sustegn-da-la-vischnanca-per-Interess-Trun